L-Imnarja

Il-lallu, fl-aħħar!
Kolja fl-aħħar iltqajna! Konna ilna ħafna nistennewk jien u ommok u fl-aħħar tfaċċajt meta ma konniex qed nistennewk. Kellek tibgħat tgħidilna li ġej ... hekk ftehimna ... imma mid-dehra ta' rasek int ukoll! Insomma, issa l-aqwa li qiegħed hawn, u għalija, flok żmien il-qtil, l-Imnarja żmien it-twelid u l-ħajja.


Pariri
Hemm skoss pariri li nixtieq nagħtik, Kolja, sbejjaħ. Imma x'jiswa? Missieri kien tani ħafna imma ftit minnhom ħadt. Jien u nqaċċatlek il-kurdun ħassejtni responsabbli: kont qed naqtgħek darba għal dejjem minn ma' ommok, kont qed nagħmel dak li kelli nagħmel, kont qed nagħtik l-aħħar imbutattura lejn id-dinja.

Inħares lejk xi kultant meta tkun mitluf fid-dinja tiegħek li ma teżistix, u narak tinħasad kull ħin bla waqt. Il-qabla tan-nuċċali rqiq qaltli li dak kollu effett tal-ħasda li ħadt malli temmejt il-vjaġġ fil-kapsula. Ma nagħtikx tort li nħsadt daqshekk, għax ħa ngħiduha kif inhi, ma nafx hux lant li tterraq fuq dal-globu. Imma se nieqaf hawn: għamilt wegħda lili nnifsi li l-valenu li xrobt jien ma ngħaddihulekx. (Anki jekk x'aktarx għad jgħaddihulek ħaddieħor.)


Xebh
Ma' xiex naqbad inxebbhek? Ma' warda? Ma' għasfur li għad irid jagħmel l-ewwel titjira bi ġwenħajh? Ma' mewġa żgħira li taraha ġejja lejk bil-kalma, li tasal fejnek, tmissek u ċċaqilqek bil-ħlewwa? Ma' xiex naqbad inxebbhek?
















Nintilef
Kemm int żgħir, Madonna! :-) U minkejja daċ-ċokon u l-kobor esaġerat tiegħi, inħossni nintilef fik, Kolja. Nerġa' nġib quddiem għajnejja l-ewwel xbieha diġitali tiegħek li rajt: ċappa, żliġa b'ponta fin-nofs tħabbat bis-saħħa kollha. Dakinhar rajtek iddeformat u abjad u iswed. U issa, int u tixher ma' wiċċi, narak roża u l-forma tixbah perfettament lil dik li għandna aħna. U nħossni nintilef, Kolja, nintilef fik.


Ħornijiet
Le mhux għalik qegħdin ipaqpqu hemm barra; mhux biex jagħtuk merħba llum li ġejt fid-dar tiegħek. Tilfu l-Ingliżi xi siegħa ilu. Tippruvax tifhem, il-bluha m'għandekx tifhimha imma tidħaq biha.

Upps, ksirt il-wegħda li ma ngħaddilekx veleni...


Il-qabla tal-malju oħxon
Il-qabla tal-malju oħxon qaltli: ara, sur Immanuel, dan l-isbaħ poeżija li għamilt. Imma int mintix poeżija, Kolja. Il-poeżiji mimlijin spirtu imma ma tmisshomx. Ma tistax tmisshom anki jekk imissuk huma. Ara lilek, nista' mmissek, u xi darba, Kolja, għad ninżlu fl-ilma u narak tieħu gost. Il-poeżija ma tagħtix gost, tagħti pjaċir mgħarraq fin-niket.